Wee zien veer?
Wee zien de Clochards? Heij kint geer ’t leze.
Rudy Gilissen
Specialis in piercings en aander awkloete. Groetgroondbezitter. Binnehoesarchitek oonder de peilers vaan de aw bruk.
Burregemeister vaan ’t stadspark, opziechter vaan de nuije vèssetrap, sluiswachter, ierste eendsjesvoorder, meuleneer en hertekampbewaaker.
Bert Janssen (01-08-1944 / 27-07-2011)
Iech bin Hubeer de Clochard, vaanaof ’t begin debei. Iech probeer miestal ’t woord te doen es get gezag moot weurde. Beveurbeeld beij ’t dekorere met us eige handgemaakte medaaljes. Op ’t Preuvenemint 2009 heet ’t de Keuningin behaag miech te iere met e lintsje in de orde vaan Oranje. Unne groete merci aon eederein dee dat meugelik heet gemaak! Bert is gestorreve op 27 juli en begraove op den daag dat heer 67 jaor zow zien gewoorde.
Math Haaken
Gebore op 28 sept 1950, oppe vriethof nommer 11 bove de kaffee “De Suisse”. Mien awwers (bekind es de Aw en d’n Awwe) waore vaan de gooje kant vaan de brugk, en iech bin geduip in de St. Servaos kerrek. Iech hob 42 jaor op de plaanke gestande es Jeu, en 20 jaor same opgetrooje met Beppie Kraft es Berb en Gradus.
Ton Gilissen
Gebore op St. Merie in 1950. Bin vaan d’n iersten daag beij de Clochards, dus al zoe’n 27 jaor. Iers es sjtacheleer in gebruukte brelle en krevatte, toen jaore es orregeldrejjer. Aoch twie jaor met un mobiel casino op unne rolstool gelaope, en noe alweer zoe’n tien jaor es de fotograaf vaan de Clochards.
Bary Berghmans
iech bin docteur Francois, dokter in ’t zoer. Mien specialiteit is kneije en zurrege dat geer kint blieve plasse zoonder te leke.
Iech bin den einigste dee niks te vertelle heet (beij de Clochards en ouch thoes) meh hub soms ’t hoegste woord.
Ton van den Eertwegh
Iech bin Ton (Deuse) en vaan ’t begin aon beij de Clochards. Iech waor altied degene dee de monika sleipde. Veer hubbe noe unne gooje lierling cq. opvolleger Marcel, dee heet ’t noe veur zien neut. Hopelik helt heer ’t lang vol (en leus heer dit neet), aanders hub iech um (de monika) weer truk!
Ed Wintjes
Iech bin Eduaar de Clochard, beter gezag: Kwaffeur Eduaar de Clochard. Iech bin sinds 1988 beij de Clochards en dat bevelt miech good. Iech hub al versjellende bijrolle gehad zoe wie met d’n dikke zjiem toen veer Heidi’s waore, en aoch wie veer dansmeriekes waore. Beij Trijn de Begijn hub iech alle rolle motte vervulle, zellefs die vaan Zwarte Piet. Noe mot iech de sjeerkwas hantere en met ’t sjerrepe sjeermets d’r achteraon. Soms hiel pijnlik veur de geachde klandizie…
Rob Ringhs
Penningmeister vaan de Clochards, etaleur, bezurger vaan de dakloozegezet. Heer zurreg eeder jaor met vastelaovend veur spek en eier zoetot veer neet nao de voedselbaank hove te goon.
Marcel Walstock
Iech bin Marcel, en iech bin begos es gas-clochard dreij jaor geleije. Iech bin 51 jaor en de knapste vaan ’t stel. Mien taak beij de Clochards is met de kwetsjbuul te sleipe, mer aoch drop te speule, wat miech good aof geit. Iech hub dat vak gelierd vaan Clochard Ton Deuse.
Vastelaovend same!
